الفصل الاول مهندسين جداد للمكتب الفني

الساعة تقريبا 3 او 4 العصر خلاص في مركز التدريب اللي مايعلم بيه الا ربنا... نعم مركز تدريب فيه كل انواع الذل بعد ماكان الواحد محافظ علي كرامته نوعا ما في مركز التدريب الاول ... ايوة انا فت علي مركزين تدريب !! حظ بقي.. الاول كان انضف مركز تدريب في مصر الحمد لله بشهادة كل الناس وشهادة الفنانين ولاعبي الكرة اللي كانوا بيتجندوا هناك (عرفت كده بعد مارحت والله) ماكنتش فارقة معايا اساسا لان كله جيش..

المهم نرجع لموضوعنا تاني وهو مركز التدريب اللي مايعلم بيه الا ربنا ده والساعة 3 او4 العصر كده تقريبا... العساكر خلاص هاتتوزع علي خدماتهم وانا هاموت من الغيظ خلاص !! ماهي لا نومة نافعة ولا اكل نافع ولا كانتين نافع ولا شكوة من كل ده نافعه في المركز ده !!! بس هانعمل ايه !!! عشان اروح الوحدة اللي انا نفسي فيها والناس حكيت لي عنها كان لازم امر علي المركز ده ... نعم.. لاجل الورد ينسقي العليق.. في الوقت ده بقي والناس بتموت من الخدمة اللي وقفناها امبارح وماعرفناش ننام بعدها... في الوقت ده بيتوزع علينا خدمة تاني طبق الاصل من امبارح !!! خلاص هانموت (انا قلت كده) !!!

في الوقت ده يظهر من بعيد صف ظابط علي قد حاله... جاي من بعيد..ومعاه ورقه في ايده.. عمال يهزر مع العساكر وصف الظباط اللي هناك... الناس كلها عارفاه الا احنا العساكر الجديد مش عارفينه فوقفنا نترقب كده عشان نعرف مين ده !! طبعا مش هاقولكم اني شكت انه ظابط الترحيل والكلام ده.. انا رحت له اساسا عشان كان نفسي يطلع هو.. لانه لو مش هو يبقي فيه 24 ساعة موت جايين تاني لحد مايجي الفرج وحد يفتركنا ويجي ياخدنا من المركز ده!!!

المهم رحت سالته (مش فاكر اسمه والله) .. هو حضرتك جاي ترحل عساكر ؟؟

اجاب: ايوة ياسيدي ليه!؟!؟

انا: مين؟!!؟ اصل احنا عساكر جداد وعايزين نعرف هانمشي امتي!!؟

اجاب: علي حسب الوحدة اللي انت هاتروحها.. وعلي العموم انا جاي اخد الجندي مجدي...... والجندي أحمد ........

انا: ايه !؟!! أحمد !! بجد والله حضرتك راجل زي العسل... ثانية وهاتلاقيني قدامك بمخلتي ياباشا... ثانية واحده...

صف الظابط: هو انت أحمد ؟!!؟

انا: ايوة ياباشا...

صف الظابط: طب يلا بسرعة لم حاجاتك عايزين نمشي بسرعة..

مهرولا للعنبر وبصوت عالي.. محمد يامجدي يلا يلا هانمشي اجهز بسرعة !!

مجدي: ايه دلوقتي !!!

انا: ايوة والله صف الظابط واقف بره اجهز بسرعة عشان الراجل مستعجل خلينا نغور من هنا..

وفعلا في اقل من دقيقتين كنا جاهزين بمخلنا انا ومحمد عشان نمشي....

وصلنا الوحدة التي تبعد عن مركز التدريب تقريبا 0.5كم وعند فتح الباب للدخول !! مش هاقولكم بقي الصرع اللي احنا كنا فيه انا ومحمد علي اللي شفناه من نظافة وجمال في الوحدة ماحدش كان متوقعه بالدرجة دي بعد ماشاف مركز التدريب اللي مايعمل بيه الا ربنا... شوارع مسفلته... خضرا في كل مكان...ملعب اخضر كبير – كنتين كبير اوي

قام باستقبالنا عسكري من العساكر العادة اسمه جمال .. جمال ده كان عسكري في الوحدة يقوم بخدمة المكتب الفني بها... عشان كده اول مالاقنا انا ومحمد داخلين مهندسين جداد للمكتب الفني هو اللي جري علينا وكان طيب اوي وفرحان اوي بينا عشان جينا وفضل معانا ثانية بثانية عشان يتعرف علينا.. كل ده واحنا في حالة ذهول.. من المنظر اللي حولينا بنحاول نستوعب الصدمة...

جمال: خلصتوا ورقكم؟!؟!

انا ومحمد: ايوة خلاص لسه مخلصين دلوقتي..

جمال: طيب ماتيجوا افرجكم علي المكتب الفني اللي انتوا هاتشتغلوا فيه

انا ومحمد: ماشي طبعا ياريت... يلا بينا

وصلنا للمكتب الفني الذي يكان يحيطه الخضرا من كل مكان

جمال: اخ.. نسيت المفاتيح.. ثواني خليكم هنا هاروح اجيب المفاتيح واجي تاني..

انا ومحمد: ماشي هانستناك هنا

انطلق جمال.... بصيت لمحمد كده مش مصدقين بعض علي منظر المكتب اللي كنا واقفين مستنيين جمال عشان يجيب مفتاحه.. اصل احنا كنا بنتفرج عليه من بره لغاية لما المفتاح يجي !!! سيراميك ايه واجهزة ايه وهو كمكتب اساسا واسع بشكل مغري حاجة كده مستوي تفكيرنا انا ومحمد ماكنش ممكن يوصل له ان يكون المكتب بالشكل ده والجمال ده... جمال جاي من بعيد شلنا المخل بتاعتنا انا ومحمد ورحنا لجمال عشن يدخلنا.. فتح جمال الباب وقعد يفرجنا علي المكتب حتة حتة بقي... ترابيزات عليها كمبيوترات... وبرينترات.... وحتة حمام استحالة حد يحلم انه يكون موجود في جيش.. حمام مالوش حل.. سيراميك وسخان وكلها حاجات مستوردة طبعا... مش مهندسين بقي...المهم احنا طبعا ماكناش حاسين بالوقت من الللي احنا عمالين نكتشفه وعمالين نتعرف علي عساكر الوحدة كلها بقي الناس اللي هانقضي معاها سنة كاملة جاية وعايزين نعرفهم.. مش بس كده اكتشفنا كمان ان الوحدة ساعتها كانت عاملة استدعاء 15 يوم للعساكر والظباط اللي كانوا مجندين قبل كده زمان... فناس كانت داخلة معانا اول يوم ليها زينا بالظبط بس هما كانوا شغالين قبل منا بقي بكام سنة فقعدا يحكوا لنا علي جمال المكان ونظافته والظابط اللي هانشتغل معاه وقوته في محافظته علي العساكر اللي شغاله معاه بس هو مش موجود دلوقتي عشان بياخد فرقة... ماشي... نستناه... دي سنة كامه احنا ورانا ايه !! وهو راجع كمان شهر... ربنا يعدي الشهر ده علي خير بقي...

كان يوم عجيب جدا.. ناس جاية استدعاء جت المكتب بتحاول تسترجع ذكراياتها في المكتب ده...وانا ومحمد بس الجداد اللي لسه جايين وبنحاول نستكشف المكان وبنسمع قصص جميله عن المكبت ده وان حتسي الشغل اللي فيه ممتع...

وكان اول حديث دار بيني وبين احد العساكر اللي كانت في المكتب اللي كانت بتنزل مبيت في الجيش انه قالي انها ممكنة في الوحدة هنا بس بعد ماتثبت نفسك عشان تطلبها بقلب جامد.... فرحت اكتر وماقولكمش عن الفرح الخمس نجوم اللي كان شغال جوا قلبي لما عرفت حاجة زي دي !! مكتب اخر تحفة ومكان نظيف جدا هاقضي فيه الجيش بتاعي... وكمان اثبت نفسي وانزل مبيت ساعتها!!! انا ماكنتش عايز اكتر من كده في جيشي !!! مش عايز اقعد في البيت واجي كل اخر شهر اقبض زي ناس ولا غيره.. انا كنت عايز اوصل للمرحلة دي بس...

المهم اللي كان بيكلمني ده بقي قعد ينصحني بقي لو نزلت مبيت اعمل ايه واخد بالي من ايه !! وكانت اول مرة اسمع فيها عن شرطة عسكرية وتحريات.. وكانت هي دي النقطة الفاصلة بيني وبين الجيش ... لان انا مش معترض علي حاجة في الجيش اكتر منا معترض علي الشرطة العسكرية دي... فالشطرة العسكرية وظيفيا دورها جامد جدا في التنظيم بين عساكر الجيش وتنفيذ القوانين.. لكن مايحدث عندما يملكونها عساكر وصف ضباط لا يستطيعون التفرقة بين الاللف وكوز الذرة !!! يبقي ساعتها خربت.. وهاتمشي انت لي مزاجهم ساعتها عشان جيشك يعدي... المهم وصلنا انا والعسكري ده القديم المستدعي اللي مش فاكر اسمه (اعذروني) عند نقطة اني اخد بالي من الشرطة العسكرية واني لو نزلت مبيت اخلي بالي واجي بدري دايما قبل الزحمة علي بوابة الجبل عشان مايحصلش مشاكل والدنيا تبقي رايقة وماحديش يتلكك لي علي حاجة !!!

طبعا انا اول مرة اسمع الكلام ده فكنت مستغرب جدا !!! طب ليه الشرطة العسكرية دي تعمل معانا كده !؟ اتضح بقي انه بيبقوا محتاجين ناس مثلا عشان يمسحوا ورا حفلة يظبطوا مش عارف ايه فيلموا العساكر من الشارع العاطل في الباطل علي اي حاجة.. ماهو لازم يلاقي في العسكري اللي قدامه غلطة حتي لو كانت علي تلميعة البيادة (حذاء الجيش)، لازم يلاقي غلطة عشان ياخده في البوكس.. المهم انا سمعت الكلام ده فقلتله طيب اجي امتي عشان اتجنب كل ده من الاخر يعني !؟!؟

قالي: يعني انت مثلا يبقي مكتوب لك في اذن المبيت لحد 7 ونص الصبح تعالي انت 7 بالظبط... بدري كده..

قلتله: ان شاء الله... ربنا يسهل واثبت كفائتي الاول...

وبالفعل كان من تاني يوم وربنا بعت لي الفرصة وكان المفروض المقدم اللي ماسك المكتب الفني لحد ما الرائد بتاعنا يرجع من ماموريته كان مزنوق في حاجة تبع الكمبيوتر مرة في نسخ السيديهات... ومرة مقدم تاني طلب مني ارسم له منظور في حتة كده عندنا في الوحدة علي الكمبيوتر.... المهم والحمد لله اثبت كفائتي وجيه الوقت اللي رحت فيه للمقدم وائل (اللي ماسك الامن والشئون الادارية) وقلتله احنا مش هاناخد اجازة ترحيل زي كل زمايلنا اللي اترحلوا معانا ؟!!؟ يعني اسبوع كده !!!

المقدم وائل: ايه انت بتهزر !! انت مش شايف الزنقة اللي احنا فيها!؟!؟

انا: زنقة ايه يافندم ؟!!؟

المقدم وائل: مافيش غيركم انتوا الاتنين بس اللي موجودين في المكتب الفني انت ومجدي.. ازاي بقي هانزلكم اجازات ترحيل ولو واحد بس قعد فيكم مش هايعرف يسد لوحده عشان لسه جديد!!

انا: طيب ايه الحل يافندم ماينفعش انزل مبيت ؟!!؟

المقدم وائل: مبيت !! هاشوف الحكاية دي وعدي عليا اخر النهار وانت وحظك لما اكلم لك سيادة العقيد لو وافق نبقي ننزلك ياسيدي...

انا: تمام يافندم.. شكرا...

وجيه اخر النهار وجت اللحظة ورحت له وفعلا قابلني وقالي انه اتعمل ليا اذن مبيت....ومحمد صاحبي كمان.... طبعا طرنا من الفرح احنا الاتنين وجرينا خدنا حاجاتنا وجهزنا ولبسنا الطقم الزيتي واستعدينا ورحنا له عشان ناخد الاذونات....

المقدم وائل: خلوا بالكم وانتوا جايين الصبح من الشرطة العسكرية اللي موجودة علي البوابة ..

انا ومحمد: تمام يافندم.. العساكر الموجودين استدعا نبهونا ليهم وان شاء الله كل خير ...

المقدم وائل: طيب يلا مع السلامة اتفضلوا...

جرينا طبعا انا ومحمد وخرجنا من البوابة والشرطة العسكرية بدون مشاكل والحمد لله... ولكن العودة كان ليها راي اخر...........