الفصل الرابع المغناطيس..

 صباح يوم جديد في الجيش هو يوم قريب اوي من الحادثة السودا اللي كانت في الفصل اللي قبل ده... حادثة الموبايل والتحريات ومجدي.... انا كنت في وسط الحادثة اللي فاتت دي قلتلكم اني كنت مخبي الموبايل الفترة دي بعدي عني شوية عشان لو حصل اي حاجة واتفتشت ماتزيدش الطينة بلة.... ساعتها انا ماكنتش عارف اطلع بالموبايل من الوحدة بقي عشان التفتيش اللي كان عليا بعد ماتفضحت اني دخلت الوحدة بالموبايل من غير اي حد مايحس... فبقي متشدد عليا الامن جامد عشان الحكاية دي !!!!
فانا بقي ماكنتش عارف اخرج بالموبايل... فكانت المشكلة اني بعد ماخرج لو اي حاجة حصلت بره معايا مع الشرطة العسكرية ولا تحريات ولا ايه نيله مش هاعرف اتصل باي حد ساعتها عشان ينقذني فاعمل ايه بقي !!؟ رحت جايب موبايل تاني ودخلت بيه الوحدة برده من غير ماحد يعرف... هاتقولوا لي ازاي هاقولكم عشان كنت بشيلهم في اماكن الجن الازرق مايعرفهمش... المهم ان انا بقي معايا في الوحدة موبايلين... وعايز اروح بيهم هما الاتنين عشان اروح واجي بموابايل واحد... بدل ماتيجي الطوبةفي المعطوبة وواحد من الموبايلين دول يتكشف امره في الوحدة والدنيا تتقلب تاني...
بس فققرت في في صباح اليوم الجديد ده اللي بقولكم عليه... قررت اني هاخرج بالموبايلين واللي يحصل يحصل ولو اي حد سالني هاقول له انهم مش بتوعي ولا اقولهم اي حاجة وان شاء الله مايحصلش حاجة... المهم اني خرجت وعديت من البوابة برده عادي جدا ماكنش فيه مشاكل عادي... واليوم ده كنت في اشد الحاجة لتاكسي عشان ياخدني من قدام الوحدة علي طول من غير مامشي نص متر عشان مايحصلش حاجة ولا موبايل منهم يقع وانا ماشي واتفضح.... فكنت خارج بتلفت حولين نفسي زي احرامي بجد بدور علي اي تاكسي !! مافيش ولا واحد... ياعة لما تعوزهم ماتلاقيهومش !!!!
وفضلت ماشي ماكملتش 200 متر بعد ماخرجت من بوابة الوحدة وبدور علي تاكسي تخيلوا لقيت ايه في وشي!؟!؟!؟ عربية شرطة عسكرية في وشي !! ماحدش يقوللي ازاي ماشفتهاش بقي طول المسافة دي عشان هاقولكم انا نفسي مش عارف!!! انا مرة واحدة لقيتها في وشي ولقيت صف الظابط خاريج منها ونازل لي... يادي النيلة عليا... عرفت ساعتها ان فيه جوايا مغناطيش بينادي اي شرطة عسكرية في الشارع... المهم...رحت معدي الشارع علي الناحية التانية والمشكلة اني عملت عبيط برده زي ماعملت في الفصل الاول برده !!! الخضة ياجماعة !!!!
عديت الناحية التانية من الشارع عشان عارف ان ممنوع اي حد من الشرطة العسكرية يجري ورا عسكري في الشارع عشان الحوادث اللي بتحصل من كده... فلقيته ركب العربية وبيلف عشان يجي ليا من الناحية التانية وعمال ينده عليا: خد ياعسكري... يابني خد مش هاعملك حاجة..
انا (في سري): ياعم اتنيل ماكلكم بيقول كده في الاول وفي الاخر هالاقي نفسي في محطة مرمية في اي حتة (سجن)
وفضلت امد لقيته بيقرب بالعربية... فاضطريت اجربي بقي وكل ده وانا خايف بس عشان الموبايلين اللي معايا اللي ممكن يودوني في 60 داهية في اليوم الغريب ده !؟!؟ يعني ماظهرش الراجل ده غير في اليوم اللي انا طالع فيه بموبايلين !!! شفتوا الحظ!؟!؟ المهم كل شوية ابص وراايا اقول يمكن زهق ومشي لقيته بيقرب بيقرب... لحد ماقرب اوي رحت انا كمان جاري قوي ومالقيتش قدامي غير جامع... رحت داخل الجامع... وقلت اكيد مش هايخش ورايا بقي في الجامع وسط الناس اللي بتصلي !!!
دخلت الجامع مالقيتش ولا واحد بيصلي !!! يادي النيلة!!! يعني مافيش حد غيري في الجامع واكيد هايجي ورايا !!! رحت باصص من ورا الباب تاني عشان اشوف هو جاي ولا لا ... المهم بصيت لقيته جاي فعلا...
تخيلوا بقي الانهيار العصبي اللي انا فيه !!! هاروح فين تاني ولا اجري فين ؟؟ خلاص انا كده في السجن في السجن لانه اول حاجة هايجي يسالها لي انت كنت بتجري مني ليه واكيد هايعرف اني معايا موبايلين مش موبايل واحد وكمان فيهم واحد بكاميرا !!!! داهية داهية يعني... وسط الانهيار اللي انا فيه ده بقي ايه اللي حصل !!! تخيلوا كده!!! استحالة برده تعرفوا انا عملت ايه عشان انا لما بنهار بعمل حاجات بقعد اضحك عليها جدا بعد كده...
عملت ايه انا بقي.. رحت عامل زي فيلم فريد شوقي لما جم يقبضوا عليه وراح عامل نفسه بيصلي !!!!!! عملت نفسي بصلي والله اكبر...
ولقيت اللي في ضهري وواقف علي باب الجامع وبيقوللي: انت فاكر اني كده مش هاعرف اجيبك !!؟! تعالي هنا..
استمرت انا فيها قلت يمكن يزهق ويمشي لوحده... لقيته فضل واقف... وراح قايل لي: انا مش ماشي من هنا غير لما تيجي...
رحت خارج انا من الصلاة بقي.. قال يعني كنت بصلي.. وباصص له وقلت له: انت عايز مني ايه!؟!؟
هو: انت بتجري مني ليه !؟!؟
انا: عشان عارف اخرك عايز تعمل ايه !؟!
هو: اخرك!! ياعم الغبي انا عايز اوصلك عشان مايحصلش لك حاجة..
انا: ياعم انا مش عايز حد يوصلني... انا هاخد تاكسي من هنا اوروح..
هو: لا بقي انا مصمم اني اوصلك يلا اطلع انا مستنيك عند العربية..
انا: ياعم خلاص بقي والله ... انا هاروح في تاكسي بقولك... انا ساكن هنا قريب مش مستاهله... (اي حاجة بقي عشان يغور بعيد عني)
هو: انا مستنيك عند العربية يلا هات حاجاتك وتعالي....
خلاص بقي مافيش مفر الراجل مصمم وانا مافيش قدامي غير اني اصدقه !! مافيش حاجة غير كده اعملها... رحت لامم حاجاتي وطلعت من الجامع لقيته مقعد عسكريين زي جوا عربية الشرطة العسكرية... يادي النيلة.. دي معناها انه لامم عساكر عشان يرميهم في اي محطة اكيد... ايه اللي هايخلي اي واحد بتاع شرطة عسكرية يلم عساكر عشان يوصلهم !؟!؟
رحت ركبت معاه العربية وخلي العسكري يقوم عشان اركب انا بداله جنبه... ركبت جنبه ودار الحواي التالي...
هو: بقي انت بتجري مني ؟!؟! بتجري مني ليه ياض !!؟
انا: ياعم هاكون بجري ليه !؟! زي ماكل الناس بتجري منكم... عشان عارفين انتوا بتعملوا ياه في العساكر اللي بتاخدوهوم.. اخرهم بيبقي في اي محطة عسكرية يمسحوا ويكنسوا ويغسلوا !!!
هو: وانت فاكر انا بقي هاعمل كده ؟!؟ ايه اللي خلاك تفتكر كده !! انا بجري وراك بقولك عايز اوصلك ...
انا: ماكلهم بيقولوا كده!!!
هو: ماهو العسكريين اللي وارك دول ماهم ركبوا عادي من غير جري ولا نيلة...
انا: (لا تعليق)
هو: انت ساكن فين بقي ؟؟
انا: ساكن في ................
هو: انت عارف اني ممكن اتحاكم عشان اللي انا عامله معاكم دلوقتي ومركب عساكر معايا العربية جنبي بدون اي سبب...
انا: (محاولا تهدئة الجو) ماهو مش كل الشطرة العسكرية زيك...
هو : مممم ..... وانتوا ساكنين فين ؟!!؟ (للعساكر اللي قاعدة ورا في العربية)
العساكر: ساكنين في ..................
هو: طيب انا هانزلكم هنا بقي اركبوا انتوا اي حاجة علي رمسيس
العساكر: الف شكر ياباشا سلام.... (ونزلوا من العربية)
هو: وانت عايز تنزل فين !؟!؟
انا: اي حتة.. نزلني قدام شوية..
ماخبيش عليكم برده انا كنت خايف برده ليحصل مشكلة عشان راكب معاه وكل ده وانا معايا موبايلين لو جم في الموضوع ولا حصل حاجة وواحد منهم وقع وانا نازل ولا وانا قاعد جنبه هاقول ايه ساعتها !؟!!؟ وفعلا نزلت بعدما نزل العسكريين بشوية عشان اخلص بقي من الموال اللي انا فيه ده... الا ان المكان اللي انا نزلت فيه كان اسوء من اني لو كنت معاه في العربية....
نزلت في شارع (----------) اللي مليان شرطة عسكرية وعرض كل اتجاه في الطريق ده 4 حارات... وطريق واسع.. يعني من الاخر انا هاعدي طريق 8 حارات وساعتها وانا بعدي ممكن تطلع اي عربية شرطة عسكرية من تحت الارض.. ده غير ان الطريق جه سريع اوي (8 حارات) ولازم اعديه براحه وانا مستعجل خلقة... المهم قلت بسم الله الرحمن الرحيم وابتديت اعدي علي اقل من مهلي عشان الطيارات اللي ماشية في الشارع دي... وحصل اللي حصل...
ايه هو اللي حصل ان بعد كل ده بعد كل الفيلم اللي انا فيه ده ووانا بعدي الموبايلين وقعوا علي الارض !!! يادي النيلة هو ده وقته !! الموبايلين مرة واحدة !!!!! وطبعا عشان انا كنت لسه في مرحلة الانهيار الفكري اللي كنت فيه كان لسه ماخلصش معايا... فرحت موطي في وسط الطيارات اللي ماشي حواليا من كل حتة والكلاكسات عليت بتاعت العريات كلها تيت تيت تييييييييييييييييييييييييييت فووووووووووووووو...
ماحدش يقولي بقي انت مابتفكرش انت مافيش عندك مخ.. في داهية الموبايلات.. بس انا هان عليا والله ساعتها بعد كل اللي حصل والمغامرات اللي حصلت دي في الفصول اللي فاتت والفصل ده كمان اني اسيبهم في الاخر مرميين علي الارض وامشي والعربيات تتولي مسؤليتهم... وطيت وجبتهم والحمد لله سليم ومافيش حاجة حصلت...روحت سليم بدون اي خدش... بس متاثر بالفيلم الرعب اللي كنت فيه....
وكانت دي نهاية قصة اخري من قصصي مع الجيش والموبايلات والتحريات والشرطة العسكرية.... الحمد لله علي كل حاجة...