الفصل الثالث تخيلوا لو كانت الفايلات فتحت

 كنت في الفصل الاول لما حكينا علي الشرطة العسكرية قدرت جدا اللي حصل لي من ورا الموبايل وانه انقذني في اخر لحظة من ورا الشمس... عشان كده بقي ليا ارتباط جامد اوي بالموبايل في اي حتة في الجيش عشان ربنا يعديها علي خير... العملية اتطورت معايا وبقيت باخد الموبايل بتاعي كل مانزل من الوحدة بتاعتي.. بالرغم من ان الموبايل لوحده لو كان اتقفش معايا كان كفيل لوحده انه يوديني في 600 داهيه... ليه!!؟؟ عشان كان موبايل NOKIA3650 ايوة ابو كاميرا...
المهم بقيت بنزل انا بقي كل 3 ايام بالتابادل مع مجدي صاحبي بعد منع المبيت في المنطقة كلها بعد الحكاية اللي حصلت في الفصل الاول... فكنت رايح جاي بيه والعملية ذادت شوية شوية جوا الوحدة وبعض الناس عرفت انه معايا فكننا بنقعد نتصور مع بعض في اي حتة.. اه في اي حتة.. وصلت لاننا كانت طلعت في دماغنا نخش نتصور جوا مكتب العقيد قائد اللواء نفسه وهو مش موجود.. قال ايه للذكري شفتوا الـ.........!!!
وفضلنا نتصور ونتصور لحد ما بقي عندنا مجموعة حلوة من الصور كده فكل واحد كان عايز ياخد الصور دي معاه علي سي دي مثلا عشان الي عايز يطبعها بره واللي عايز ياخدها للذكري.. بس انا ماكنتش راضي لان معظم العساكر كانت عادة (امية) فكانت ممكن يحصل حاجة معاها وهي بالصور دي بره ونروح ورا الشمس بجد بقي... وانا بالنسبة لي ماكنش فيه مشاكل لان انا كده كده كانت معايا علي الموبايل بنزلها عندي علي الجهاز ومافيش مشاكل...
الي ان جيه يوم ومجدي صاحبي كان عايز ياخدهم علي ديسكات معاه وهو مروح ميت غمر عشان تبقي معاه.. فطبعا وافقت لاني مطمن مش هايحصل حاجة مع واحد عارف خطورة حاجة زي دي لو اتقفش بيها بره واحنا متصورين كلنا بالملابس العسكرية بتاعتنا...
مجدي: انا عايز اخد الصور معايا بقي واحنا نازلين مع بعض المرة دي
انا: ماشي ياعم شوف لك ديسكات فضيها وخد عليها الصور بس خلي بالك عشان مايحصلش حاجة..
مجدي: ياعم خير ان شاء الله....
المهم مجدي واحنا ماشين لقيته كان معاه الديسكات ومخبيها معاها وخرجنا وكل شئ تمام الحمد لله وركبنا انا وهو وكل واحد مروح...وصلت البيت وعلي الساعة 9 بالليل كده تليفوني رن....
اللي بيتصل: سلام عليكم..
انا: عليكم السلام
اللي بيتصل: انا تامر اخو محمد صاحبك اللي معاك في الجيش
انا: اه اهلا وسهلا...
تامر: هو محمد منزلش النهاردة ولا ايه؟!؟!
انا: لا ازاي ده نازل معايا وانا مركبه قبلي وركبت انا بعديه كمان.. يعني هو راكب قدامي وجايلكم في الطريق.. هاتلاقي بس الطريق زحمة...
تامر: اه يعني هو نزل النهاردة يعني..
انا: اه والله... هو بس تلاقي الطريق زحمة بس..
تامر: اصله اتاخر كده شوية وهو كان بيجي علي طول...
انا : ان شاء الله يوصل بالسلامة.. ماتقلقش
تامر: ماشي متشكر اوي ... وقفل الخط...
في اليوم التاني التليفون رن مرة تانية علي نمرة ماعرفهاش برده...
اللي بيتصل: سلام عليكم ياحمد
انا: ايوة مين معايا
اللي بيتصل: انا المقدم وائل ياحمد
انا (في حالة ذهول): ايوة اهلا يافندم.. اؤمر يافندم...
المقدم وائل: انت مش نزلت امبارح انت ومحمد
انا: ايوة يافندم...
المقدم وائل: امال يابني هو راح فين؟؟ ده لسه ماوصلش لحد دلوقتي...
انا: مش عارف والله يافندم.. انا مركبه قبلي امبارح وهو مروح قدامي
المقدم وائل: يعني مافيش حد ضايقه في الشرطة العسكرية وانتوا خارجين؟!؟!
انا: لا والله يافندم احنا مروحين عادي بدون مشاكل وراكب قبلي زي مابقول لحضرتك...
المقدم وائل: ماشي يابني.. شكرا... وقفل الخط
في اليوم التالت قبل ماروح الوحدة الصبح بدري رن التليفون مرة تالتة بس المرة دي من رقم الوحدة نفسه
اللي بيتصل: ايوة ياحمد...
انا: ايوة مين معايا
اللي بيتصل: انا جمال اللي معاك في المكتب الفني...
انا: ايوة ياجمال ايه الاخبار عندك... لسه مافيش اخبار عن محمد حد لاقاه!؟!؟
جمال: لا ياحمد.. مانا باتصل بيك عشان اعرف اذا كان في حد كلمك قالك حاجة جديدة!؟!؟
انا: لا والله ياجمال مافيش اي اخبار عندي انا كمان
جمال: هو محمد خد معاه الصور ياحمد!؟!؟
انا: ايوة..... (وقلبي وقع في رجلي)
جمال: لحسن يكون اتمسك بيهم
انا: لا ياعم انت بتهزر!!! ده مخبيهم قدامي في مكان سحري ماحدش يعرف يجيبه...
جمال: طيب يبقي تلاقيه بس واحد بتاع شرطة عسكرية مغلس عليه وهو في رمسيس بيركب
انا: مانا بقول كده برده ياجمال...
جمال: يبقي احنا كده مستنيين جواب من المحطة اللي هو اترحل عليها لو راح الشرطة العسكرية وحد كان غلس عليه فعلا...
انا : ربنا يجيب العواقب سليمة بقي...
وانتهت المكالمة ورحت الوحدة تاني يوم عادي جدا والجو مستتب ودخلت بدون مشاكل الحمد لله برده.. ماهو انت لازم تحمد ربنا كل مرة وانت خارج وانت داخل ان العملية عدت علي خير عشان بتوع الشرطة العسكرية دول... المهم دخلت الوحدة وقابلت العساكر هناك لسه عمالين بيسالوني علي محمد وانا بسالهم برده ومحدش عارف هو فين... بس ماكنش فيه شغل فقلت اخد تعسيلة كده مادام الامن مستتب..وشوية وتليفون المكتب رن وطلع المقدم وائل طلبني ورحت له المكتب وقعد يناقشني في الرسمة اللي رسمتها له قبل كده بالمنظور... وخلاص سيبته ورجعت المكتب تاني ولقيت جمال مستنيني
جمال : انهم بيدوروا لسه علي محمد ومش لاقيينه في اي محطة تبع الشرطة العسكرية...
انا الفار ابتدي يلعب في دماغي بجد وبقيت مش عارف ايه اللي بيحصل معاه ده !!!! المشكلة ان معاه الصور وربنا يستر علينا !!!
انا: طيب امال هايكون ايه اللي حصل طيب ياجمال!؟!؟
جمال: ممكن يكون اتمسك تحريات!!!
انا: ايه تحريات !!؟!؟ ياعم ماعتقدش انها وصلت للدرجة دي وبعدين ماهم لو لقوا معاه الصور وهو ماعرفش يتخلص منهم هايلاقوا صور عبيطة يعني.. ماتستحقش!!!
شوية ولقينا المقدم وائل بيفتح الباب بقوة وداخل علي المكتب بشكل فظيع ومعاه ظابط كمان انا مش عارفه..
المقدم وائل: كله يقوم من علي الاجهزة وتعالوا لي هنا حالا..
انا وجمال وباقي العساكر اللي كانت قاعدة بصينا لبعض وعرفنا انها كده يبقي تحريات وربنا يستر....
انا: هو مين الظابط اللي معاه ده ياجمال
جمال: ده الرائد امجد خلص الفرقة بتاعته ورجع اخيرا اهو...
المقدم وائل (واحنا واقفين قدامه): انتو حاطين صور سكس هنا علي الاجهزة !؟!
انا (في حالة ذهول وتاكد من ان كده محمد اتقفش بالصور): لا والله يافندم سكس ايه بس ؟!!
المقدم وائل: امال محمد اتمسك بصور ازاي في التحريات وبيقول انه واخد الصور دي من هنا؟!!؟
انا والعساكر: مانعرفش يافندم.. بس الاجهزة قدام حضرتك مش عليها اي صوره ودور حضرتك بنفسك..
المقدم وائل: ماحنا هاندور.. بس مش عايز مخلوق منكم يتحرك من هنا...
احنا كلنا: تمام يافندم...
العملية طبعت ساعتها طولت عشان هو والرائد امجد كانوا بيدورو علي كل الاجهزة اللي موجودة في المكتب علي اي صور سكس!!!
ساعتها انا وجمال افتكرنا ان صورنا بتاعت الموبايل موجودة علي جهاز من الاجهزة ولو لاقوها هانروح في داهية... بارغم من احنا رايحيين كده كده عشان اكيد هايتعرف ان محمد ماكنش معاه صور سكس وانه معاه صورنا واحنا في الوحدة هنا... المهم اتفقنا انا وجمال انه يلخم المقدم وائل ويجيب له اي حاجة يشربها لحد مانا اتسحب اروح علي اي جهاز اخش من علي الشبكة فيه علي الجهاز اللي عليه الصور عشان امسحها.. وبالفعل تمت الخطة بنجاح ومسحت الصور وفي الوقت ده كان لقينا المقدم عبد الرحيم (اللي كان ماسك المكتب الفني في غياب الرائد امجد) جاي علي المكتب الفني ودخل مع المقدم وائل تاني المكتب وانا فرحان بقي انا وجمال اننا عرفنا نمسح الصور.. عشان يدوروا هما بقي براحتهم علي الاجهزة...
المقدم عبد الرحيم: انتوا عملتوا ايه ياحمد الله يخرب بيوتكم الدنيا مقلوبة في المنطقة كللها !!
انا: والله ماعارف يافندم (بعمل عبيط بقي) ماعرفش ايه الصور اللي لقوها مع محمد دي والمقدم وائل بيدور علي الاجهزة اهو والله !!!
المقدم عبد الرحيم: هايبان كل حاجة دلوقتي...
شوية والتليفون رن والمقدم عبد الرحيم هو اللي رد ولاقيناه بيتكلم عن صور... عساكر.. وحدة... بس كده خلاص الموضوع اتعرف ورحنا في داهية...
المقدم عبد الرحيم: الواد ماطلعش معاه صور سكس ياوائل
المقدم وائل: امال ايه ؟!؟!
المقدم عبد الرحيم: ده لقوا معاه ديسكات عليه صور العساكر اللي قدامك دي جوا الوحدة هنا وفايلات صاعقة وعمليات علي كام ديسك معاه
المقدم وائل: يانهار اسود... ايه الصور دي ياحمد!؟!!
انا (في حالة غيبوبة وبدور علي اي كذبة بقي وانا بتكلم) : دي صور كنا احنا لقطناها لبعض هنا يافندم .... في المكتب...
المقدم وائل: الصور دي انتوا اتصورتوها ازاي هنا؟؟!؟
انا: بالكاميرا اللي موجودة في المكتب هنا يافندم
المقدم وائل: ايوة بس دي مافيهاش شحن؟!؟!
انا: ماحنا كنا جايبين بطاريات
المقدم وائل: واتصورتو بيها فين بقي؟؟
انا: في المكتب هنا يافندم... (طبعا احنا متصورين في كذا حتة)
المقدم وائل: الله يخرب بيوتكم انتوا قلبتوا الدنيا في المنطقة كلها... امال ايه فايلات الوورد اللي لاقوها علي الديسك مع محمد دي؟؟!؟
انا: والله ماعرف يافندم ..
التليفون يرن تاني... والمقدم عبد الرحيم يرد والمرة دي كان علي ان محمد وصل في المنطقة وعايزين حد من الوحدة يروح يجيبه... وراح المقدم عبد الرحيم خرج عشان يروح يجيبه.... وخرج وراه المقدم وائل عشان يشوف ايه اللي بيحصل... وفي الوقت ده طبعا اول حاجة جات في دماغي ان ازاي اخفي الموبايل ده لاني كده ممكن اروح في 60 داهية في اي وقت لو اتعرف ان الموبايل موجود معايا لسه لحد دلوقتي وعليه الصور!!! فرحت مشاور لجمال تاني علي الموبايل ولازم نخلص منه دلوقتي... راح واخده مني وعمل نفسه كانه بيرجع الشاي اللي كان بيشربه المقدم وائل واداه لعسكري بره يكمره في اي حتة بعيد عن المكتب الفني دلوقتي... لحد مانخلص...
الرائد امجد: انتوا عملتوا ايه ياض؟!؟!
انا: والله ماعملنا حاجة يافندم.. دي كام صورة كنا واخدنا مع بعض هنا في المكتب
الرائد امجد: كام صورة ايه بس... دي فيها تحريات الله يخرب بيوتكم وجايز تيجي في ايو وقت دلوقتي وتعمل تفتيش... شيلوا كل حاجة من علي الاجهزة ماعدا الشغل... اغاني.. لعب... صور.. كليبات.. اي حاجة غير الشغل علي الاجهزة تتمسح...
انا: حاضر يافندم...
المقدم وائل (بعد مادخل): ها يا أمجد؟!!؟ ايه الاخبار!!؟
الرائد امجد: تمام يافندم اهو كله بيشيل الحاجات اللي مالهاش لازمة من علي الاجهزة ماعدا الشغل...
المقدم وائل: اه والنبي يا أمجد وشوف انت بنفسك علي كل جهاز عشان نتاكد... تابع بنفسك ياأمجد...
شوية كده ودخل المقدم عبد الرحيم ومعاه مجدي اخير... بس ماقولكمش بقي علي شكله!!! زي اللي راجع من نكسه 67 بصينا ليه كلنا عايزين نعرف منه ايه اللي حصل مالقيناش علي وشه اي تعبير من التعبيرات نعرف ايه اللي حصل منه.... وراح المقدم وائل منادي له علي طول ودار الحوار التالي...
المقدم وائل: ايه اللي حصل يابني؟!!؟
مجدي: انا كنت مروح يافندم واتمسكت من بتوع التحريات اللي موجودين في موقف عبود..
المقدم وائل: وايه اللي خلاهم يمسكوك؟؟! دول مابيمسكوش غير الي معاه حاجة ممنوعة...
مجدي: مانا كان معايا ديسكات علي صور لينا انا والعساكر هنا يافندم...
المقدم وائل: والديسكات دي جبتها منين وكنت شايلها فين !؟!؟
مجدي: كانت هنا في المكتب يافندم.. وكنت شايلها في جيب السترة (القميص) يافندم...
انا ( في سري): الله يخرب بيتك انت طلعتهم من المكان اللي كنا مخبينهم فيه ليه تحت الهدوم؟!؟!
المقدم وائل: الصور دي كانت فين يامحمد..
مجدي: كانت هنا في المكتب يافندم، وفي الملعب بتاع التمارين وفي قاعة ميس الظباط
المقدم وائل طبعا راح باصص لي انا ساعتها عشان انا ماقلتش علي كل ده !!!!!
المقدم وائل: ومين اللي فتح لكم ميس الظباط ده!؟!؟!
مجدي سكت وارح قايل: احنا لاقيناه مفتوح يافندم
المقدم وائلفي حالة غضب : مفتوح ايه ياض ؟!؟!؟! جمال طبعا اللي فتح لكم!؟!؟
حالة من السكوت التام ماحدش بيتكلم...
المقدم وائل: مممم.... ومين بقي اللي صوركم الصور دي يامحمد ؟!؟!
مجدي (بكل سذاجة): أحمد يافندم... وساعات انا...
المقدم وائل طبعا راح باصص لي تاني طبعا، وقال لمحمد: انتوا اتصورتوا بيها ازاي دي يامحمد ؟!!
مجدي بعد سكوت بتاع 10 ثواني كده وحاول يبص لي بس انا كنت واقف وراه مش جنبه حتي... : اتصورنا بالموبايل اللي مع أحمد يافندم...
المقدم وائل بص لي تاني بس المرة دي بصه غير اي بصه بقي: انت معاك موبايل بكاميرا ياحمد هنا!؟!؟
انا (منك لله يامحمد في سري): ايوة يافندم.. كان معايا في الاول بس لما كنت لسه جاي هنا الوحدة...
المقدم وائل طبعا راح باصص لي انا ساعتها عشان انا ماقلتش علي كل ده !!!!!
وائل: وهو فين دلوقتي؟!!؟
انا: في البيت يافندم مابقيتش اجيبه معايا....
المقدم وائل: امال كنت بتقول ليه انت وشوية العساكر الـ.......... انكوا اتصورتوا بكاميرة المكتب؟!؟
انا والعساكر : ............................................... حالة من الصمت بلا اي رد....
المقدم وائل: ماشي ماشي.... ويامحمد ايه الفايلات بتاعت الصاعقة والعمليات دي اللي لاقوها معاك علي الديسكات دي؟!!؟
مجدي: دي فايلات كانت علي الديسكات انا سيبتها زي ماهي ... بس والله ماشتغلت هناك عندهم في التحريات يافندم مارضيتش تفتح...
انا (في سري): الله يخرب بيتك يامحمد مانا قايلك فرمت الديسكات قبل ماتاخدها علي الاقل كانت الصور كلها هاتيجي ديسك ولا اتنين بالكتير... مش 4 ديسكات مليانيين بلاوي......
المقدم وائل: هايبان كل حاجة في الـ48 ساعة اللي جايين دول لو مروا علي خير مع التحريات يبقي مكتوب ليكم تعيشوا... ادعوا بقي انكم ماتروحوش محاكمة عسكرية علي الهبل اللي انتوا عملتوه ده... كل واحد يجيب لي الشنط بتاعته دلوقتي حالا
كلنا جرينا طبعا كل واحد جاب الشنطة بتاعته ورجع تاني عليه... وقعد يفتش في كل شنطة لوحدها والحمد لله ماكنش فيها اي حاجة عشان العملية مش ناقصة ايه تاني ممكن يحصل بعد كل اللي حصل ده !؟!؟
المقدم وائل: كلكم تحضروا نفسكم بقي في خلال الـ48 ساعة اللي جايين دول عشان هاتتعرضوا علي العقيد ادعوا بقي علي الداهية اللي وقعتوا نفسكم فيها دي...
وخروج وراح علي مكتبه هو والمقدم عبد الرحيمو الرائد امجد اللي كان لسه جاي الوحدة النهاردة واول يوم يجي فيه زي مانتوا شايفين كده اللي حصل لنا.... شفتوا بقي الاعترارف الصريح اللي قاله محمد !؟!؟ في صراحه اكتر من كده !!!! لا طبعا.... شفتوا بقي لو كنا اتصورنا في مكتب العميد كمان كان ايه اللي ممكن يحصل تاني اكتر من كده !؟! وطبعا من تحت راس الموضوع ده الوحدة كلها قعدت ماحدش نزل اجازات خالص لحد مانشوف المشكلة دي عشان لو جت التحريات تفتش علي الوحدة...
وفات 48 ساعة كانهم دهر كامل.. بس الحمد لله مافيش حاجة حصلت... الـ48 ساعة دول كان ملخصهم بقي ان احنا قاعدين نفكر ايه اللي ممكن يحصل وهايعملوا فينا ايه !!!! وفي الكلام اللي قاله محمد وليه غير مكان الديسكات من المكان اللي كنا متفقين عليه وشالهم في جيب السترة كده عيني عينك !!! طلع ان محمد صاحبي كان واثق ان مافيش حاجة ممكن تحصل زي دي لانه خلاص وصل موقف عبود وكان مسافر خلاص... يعني جت علي اخر لحظة دي.... تخيلوا لو كانت الديسكات دي الفايلات بتاعت الصاعقة والعمليات اللي عليهم فتحت كان ممكن يحصل ايه فينا !؟؟!
طبعا انا بقي كنت قاعد بفكر كمان في كل اللي انا عملته في الوحدة هنا وازاي ضاع في لمحة عين عشان التصوير والموبايل.. ازاي ان انا هابدا من الصفر تاني عشان احاول محو الصورة اللي انا اتحطيت فيها دي.... والصورة اللي انا كونتها عن نفسي مع كل الظباط وصف الظباط والعساكر هنا في الوحدة ازاي اتهزت عشان غلطة ساذجة زي دي وازاي هاثبتها تاني من اول وجديد!!!
المهم فاتت الـ48 ساعة واتنادي علينا كلنا (كل اللي ظهروا في الصور) عشان نروح للمقدم وائل عشان هايدورنا مكتب للعقيد !!!! كلنا افتكرنا ساعتها ان العملية باظت وان التحريات عملت حاجة... لكن الحمد لله انهم كانوا عاقلين وماحدش منهم لا فتش ولا نيله عشان هما عرفوا ان شوية الصور العبيطة اللي احنا متصورنها دول مالهمش لازمة ومافيهمش مشاكل.. المشكلة كانت في فايلات الصاعقة والعمليات اللي كانوا علي الديسكات اللي مجدي ممسحش منهم حاجة .. المهم رحنا ودخلنا علي العقد مع المقدم وائل .. وكل واحد فينا خد له كلميتن طبعا من اللي هما .. المشكلة ان كل ده كان معروف ومافيش اي حاجة ممكن تدافع بيها عن نفسك !!! هاتدافع عن ايه وانت غلطان 100 % فكله سمع وسكت عشان كنا خايفيين من اللي جزاء اللي كل واحد هاياخده... ورسيت في الاخر علي 5 ايام حبس انا ومحمد و3 ايام حبس لجمال ولباقي الناس اللي اتصورت.....
طبعا الحمد لله ان الواحد الصورة اللي كان عاملها والعلاقات اللي كانت موجودة مع الظباط كلهم خلوا العملية رسيت علي مافيش حبس بس اتحجزنا تقريبا ساعتها شهر تقريبا ماشفناش الشارع ولا ايه حاجة.... بس الحمد لله انها رسيت علي قد كده ماتطورتش لمحكمة عسكرية اعوذ بالله... وابتديت من الصفر تاني طبعا بعد الشهر ده والحمد لله ربنا اداني الفرصة تاني عشان اثبت كفائتي عشان نعرف نتكلم في اجازات تاني والحمد لله عدت علي خير برده......